Կոնֆերանս. Դատական ճակատագրական սխալների շտկման բրիտանական փորձը

Հարգելի գործընկերներ, պաշտոնյաներ, իրավաբաններ, լրագրողներ, քաղաքացիներ և այլոք:
Հայաստանում Մեծ Բրիտանիայի դեսպանատան աջակցությամբ «Բրիտանական հորիզոններ» ծրագրի շրջանակներում, «Բաց հասարակության հիմնադրամներ-Հայաստան» հիմնադրամի և ԵԱՀԿ երևանյան գրասենյակի համաֆինանսավորմամբ «Անմեղության հայկական ծրագիր» ՀԿ-ն հունվարի 30-ից փետրվարի 6-ը Երևանում հյուրընկալելու է դատական ճակատագրական սխալների շտկման գործում մեծ ճանապարհ անցած երկու բրիտանացի մասնագետների: Նրանցից մեկը դոկտոր Մայքլ Նոթթոնն է, որը Բրիսթոլի համալսարանում հիմնադրել է «Անմեղության ծրագիրը», օգնելով բազմաթիվ անմեղ դատապարտյալների տարիներ անց արդարացման դատավճիռներով ազատություն վերադառնալ: Նա Երևան է գալու դատական սխալի զոհ Մայքլ Օբրայենի հետ, որը 11 տարի անցկացրել է բանտում իրական հանցագործի փոխարեն: Ապա դարձել է իրավաբան ու հիմա ինքն է իր գիտելիքներով ու փորձով օգնում դատական սխալի զոհերին: Նրանք ներկայացնելու են քրեական գործերով իրեղեն ապացույցների պահպանման, հին գործերի վերաբացման, դատական սխալների շտկման իրենց փորձն ու օրենսդրական փոփոխությունների հիմնավորումները:
Փետրվարի 3-ին` ժամը 11:00-14:00 «Կոնգրես» հյուրանոցի «Պիկասսո» սրահում բրիտանացի երկու մասնագետների մասնակցությամբ տեղի կունենա կլոր սեղան՝ «Դատական սխալների հետևանքներն ու շտկման նոր գործիքները. բրիտանական փորձը» թեմայով:
Սիրով հրավիրում ենք բոլորին մասնակցելու կոնֆերանսին: