Վահան Թոփչյան «Թռչուն. Բնապատկեր»

Ապրիլի 17-ին՝ ժ. 17:00-ին, Դալան ցուցասրահում տեղի կունենա Գալերի 25-ի արվեստագետ՝ Վահան Թոփչյանի «Թռչուն. Բնապատկեր» ցուցահանդեսի բացումը: Ցուցահանդեսը բաց կլինի մինչև ապրիլի 24-ը:
Եթե մոնոխրոմությունը նույնպես համարենք վերացարկման աստիճաններից մեկը, ապա Թռչուններ և Բնապատկերներ շարքերը գտնվում են առարկայականությունից դեպի վերացարկում ճանապարհի տարբեր հանգրվաններում: Վերացարկում, որը ինքնանպատակ չէ, այլ հնարավորություն է մոտենալ իրականության այն «անառարկայական» շերտին, որին շարունակ տարբեր կերպարներ և բացատրություններ պարտադրելով հաճախ ստիպում են կորցնել իր իսկական էությունը: Երկու շարքերում էլ գերիշխողը մոխրագույնն է, որ անցումային է սևի ու սպիտակի միջև: Սևի, որն ըստ Մալևիչի մոռացության գերմենևտիկական խորհրդանիշն է, և սպիտակի, որ նա անվանում է «պատկերների պատկեր», քանի որ սպիտակի վրա, որպես էկրանի,կարող են կենդանանալ նրա մեջ պարփակված բոլոր հնարավոր գույներն ու ձերը: Հետևաբար այս շարքերը իրականացված են այս երկու բևեռների միջև գտնվող տարածքում: