18-20-րդ դարերի ռուս և խորհրդային նկարիչների գրաֆիկա

Նոյեմբերի 25-ին՝ ժամը 15:00, Հայաստանի ազգային պատկերասրահում կբացվի 18-20-րդ դարերի ռուս և խորհրդային նկարիչների գրաֆիկական աշխատանքների ցուցահանդեսը: Ցուցադրությունը ներառում է 226 աշխատանք` պատկերասրահում պահվող 18-20-րդ դարերի ռուսական գրաֆիկայի և խորհրդային նկարիչների ջրանկարների ու գծանկարների ավելի քան 500 ստեղծագործություններից: Թանգարանի հավաքածուն ներառում է 19-րդ դարավերջի և 20-րդ դարասկզբի հայտնի նկարիչների բազում գլուխգործոցներ: Լայնորեն ներկայացվում է այդ սահմանային ժամանակահատվածի վարպետների բարդ և բազմանշանակ աշխարհը՝ Կ. Բրյուլով, Ա. Իվանով, Ա. Օռլովսկի. Բռունի, Վ. Շտերենբերգ, Մ. Վռուբել, Վ. Բորիսով-Մուսատով, Վ. Սերով, Մ. Նեստերով, Վ. Կանդինսկի, Պ. Կոնչալովսկի և շատ այլ նկարիչներ, որոնք աչքի են ընկնում իրենց անհատական աշխարհայացքով և պլաստիկական մարմնավորման հնարավորություններով: Նշանակալից են նաև նկարիչների հայկական թեմաներով պատկերները, որոնք կազմում են հավաքածուի ուշագրավ մասերից մեկը: Ռուս և խորհրդային վարպետների աչքերով Հայաստանը ներկայացնող աշխատանքները վկայում են, թե ինչ անկեղծ հետաքրքրություն են տածել ռուսական մշակույթի լավագույն ներկայացուցիչները մեր երկրի նկատմամբ: