Gegham Grigoryan 70

ՀՀ ԿԳՄՍ նախարարության աջակցությամբ, «ԹԻ ԷՄ Փրոդաքշնը» նոյեմբերի 21-ին՝ ժամը 19։30-ին, Ա.
Սպենդիարյանի անվան օպերայի և բալետի ազգային ակադեմիական թատրոնում կիրականացնի
աշխարհահռչակ տենոր Գեղամ Գրիգորյանի 70-ամյակին նվիրված գալա համերգը:
Համերգին մասնակցում են հայ անվանի օպերային երգիչներ Բարսեղ Թումանյանը, Հասմիկ Պապյանը,Գևորգ Հակոբյանը, Կարինե Բաբաջանյանը (Գերմանիա), Հովհաննես Այվազյանը, Լիանա Ալեքսանյանը (Գերմանիա), Խաչատուր Բադալյանը (ՌԴ): Հրավիրյալ դիրիժոր, Գեղամ Գրիգորյանի վաղեմի գործընկեր
Անտոնելլո Ալլեմանդին (Իտալիա) կղեկավարի Ա. Սպենդիարյանի անվան օպերայի և բալետի ազգային
ակադեմիական թատրոնի սիմֆոնիկ նվագախումբը։
Հոբելյանական համերգին կհնչեն օպերային սիրված արիաներ` Ա․ Հարությունյանի, Ա. Տիգրանյանի, Ռ.
Աբրահամյանի, Ջ. Վերդիի, Ջ. Պուչինիի, Ժ. Բիզեի, Պ. Չայկովսկու, Պ. Մասկանիի, Է. Կուրտիսի
գլուխգործոցներից, կցուցադրվեն հատվածներ մաեստրոյի կատարումներից, կներկայացվի հատուկ
հոբելյանական երեկոյի համար Արսեն Մեհրաբյանի բեմադրած բալետային համարը` Աննա Քալաշյանի
կատարմամբ:
Հատկանշական է, որ Գեղամ Գրիգորյանի անզուգական ձայնն իր հզոր, արտահայտիչ, յուրահատուկ վառ
տեմբրով և արտիստական ​​հմայքն իր բազմերանգությամբ ու ինքնատիպությամբ գրավել են աշխարհի
ունկնդրի սիրտն ու դարձել համաշխարհային արժեք ու մեծություն։
«Բոլոր ժամանակների տենոր», «Աստվածատուր երգիչ», «Ժամանակակից մեծագույն տենորներից մեկը».
այսպես է ընդունում, բնութագրում աշխարհի ունկնդիրը, քննադատն ու երաժիշտը Գեղամ Գրիգորյանին՝
աշխարհի հինգ լավագույն տենորներից մեկին։