Հովհաննես Շիրազի ծննդյան 100–ամյակին նվիրված հոբելյանական երեկո

ՀՀ մշակույթի նախարարության նախաձեռնությամբ դեկտեմբերի 3- ին` ժամը 19:00- ին, Ա. Սպենդիարյանի անվան օպերայի և բալետի ազգային ակադեմիական թատրոնում տեղի կունենա մեծանուն հայ բանաստեղծ Հովհաննես Շիրազի ծննդյան 100–ամյակին նվիրված հոբելյանական երեկո:
Հոբելյանական երեկոյի ընթացքում ելույթ կունենան Երևանի Ձայնի պահպանման վոկալ երգչախումբը, «Բերդ» պարային անսամբլը, «Ինտեր դանս» պարային համույթը, Գյումրու Վարդան Աճեմյանի անվան պետական դրամատիկական թատրոնը, Հայաստանի ազգային նվագարանների պետական նվագախումբը:
Հովհաննես Շիրազը 20–րդ դարի հայ պոեզիայի ամենավառ ներկայացուցիչներից է: Նա գրականություն մտավ որպես ավետաբեր՝ նորովի ու վերաիմաստավորված ներկայացնելով հայրենիքի, բնության, սիրո, մայրական սիրո և այլ թեմաներ: