Հանդիպում կոմպոզիտորի հետ. Կարեն Հակոբյան

Դեկտեմբերի 9-ին, ժամը 19:00-ին Նարեկացի Արվեստի Միության «Հանդիպում կոմպոզիտորի հետ» շարքը հրավիրում է բոլորին կոմպոզիտոր Կարեն Հակոբյանի հետ հանդիպմանը:
Ամերիկահայ դաշնակահար և կոմպոզիտոր Կարեն Հակոբյանը՝ 17 տարեկանում Կարնեգի Հոլում իր առաջին ելույթն ունենալուց հետո հանդես է եկել Հայաստանի, Արգենտինայի, Մեքսիկայի, Գերմանիայի, Ֆրանսիայի, ԱՄՆ-ի լավագույն բեմերում:
Երաժիշտն իր մասնագիտական առաջին քայլերն արել է Երևանի Չայկովսկու անվան երաժշտական միջնակարգ դպրոցում՝ ուսանելով աշխարհահռչակ դաշնակահար Արմեն Բաբախանյանի դասարանում, ապա կոմպոզիցիա ուսանել Դավիթ Սաքոյանի մոտ:
Նա որպես մենակատար է հանդես եկել աշխարհի տարբեր սիմֆոնիկ նվագախմբերի հետ՝ Յուտայի Համալսարանի ֆիլհարմոնիկի, Սոլթ Լեյքի սիմֆոնիկի, Ամառային արվեստների փառատոնի, Նյու Ամերիքեն սիմֆոնիկի , Ռիջվուդ սիմֆոնիկի, Ուրեուկի սիմֆոնիկի, Կոնկորդ կամերայինի, Համաշխարհային փառատոնի, Տուկումանի ֆիլհարմոնիկ նվագախմբի (Արգենտինա), Մոնտերեյի սիմֆոնիկ նվագախմբի (Մեքսիկա), Հայաստանի ֆիլհարմոնիկ նվագախմբի, Սերենադ կամերային նվագախմբի, և Հայաստանի ազգային կամերային նվագախմբի հետ:
Մասնակցելով բազմաթիվ միջազգային պատվաբեր մրցույթների՝ արժանացել է բարձրագույն գնահատանքի՝ ստանալով բրոնզե մեդալ Համաշխարհային դաշնամուրային միջազգային մրցույթում, 1-ին մրցանակ Պինաուլտի միջազգային դաշնամուրային մրցույթում, և 2-րդ մրցանակ «Հայաստանի ժառանգություն» դաշնակահարների միջազգային մրցույթում:
Կարեն Հակոբյանը թողարկել է դաշնամուրային կատարումների 2 և իր ստեղծագործությունների 1ձայնասկավառակ: Նա Նյու Յորքում հիմնել է Համաշխարհային Խաղաղության Սիմֆոնիետա նվագախումբը, որն արդեն հանդես է եկել Հայոց Ցեղասպանության 100-րդ տարելիցին նվիրված համերգով:
Մուտքն ազատ է: