Դավիթն ու Տարոնը հրավիրում են ամանորյա թեյերի հյուրասիրության-համերգի

Սիրելի պլատոնականներ, մենք Դավիթի հետ վերջապես հրավիրում ենք բոլոր թեյասեր ու բարի մարդկանց, միասին ճաշակելու տարբեր թեյեր, որոնք Դավիթը ձեռք է բերել աշխարհի տարբեր անկյուններից և հասցրել Պլատո: Նա մի խենթ անձնավորություն է, հրաշալի հոգեբան ու պարզապես մեծ սիրտ ունեցող մի մարդ, ով աշխարհին երբեք չի դադարում նայել սիրով լի և օպտիմիստական հայացքով:
Դավիթին յուրաքանչյուրը գիտի տարբեր ասպարեզներից` որպես հոգեբան, որպես իր հայրենիքին ու երիտասարդության հիմնախնիրներին նվիրված փորձագետ, ռեկորդակիր վազորդ և այժմ նաև` որպես թեյասեր ու «թեյաՀՅՈՒՐասեր» անձնավորություն:
Դավիթը մեզ առաջարկեց իրականացնել այս միջոցառում-հյուրասիրությունը «Պարգևենք Ժպիտ» Հ/Կ հետ` նպատակ հետապնդելով օգնել 9 տարեկան Լիանա Գորոյանին ամանորյա բժշկական նվերով, որը կենսական է այդ աղջնակի առողջության համար, ով ունի բարդ շնչառական խնդիրներ: Միջոցառումն անվճար է, զուտ հյուրասիրություն է, իսկ նվիրատվության չափը` ըստ ցանկության:
Նախաձեռնության մասին իմանալով` մեզ միացավ մեր սիրելի Տարոնը, հիանալի երաժիշտ ու կատարող, ով պատրաստվում է իր ծննդյան օրը նվիրել այս միջոցառմանը և մեզ համար կիթառով կատարել հայկական ու համաշխարհային հիթեր: Նա շուտով մեկնելու զին. ծառայության ու մենք միասին պետք է մեր բարեմաղթանքները հղենք նրան ինչպես տարեդարձի, այնպես էլ` այս կապակցությամբ:
Ի՞նչ կասեք... նման մարդկանց հետ շփվելիս, հասկանում ես, որ բարությունը հաստատ կփրկի' աշխարհը:
* * * * *
Թեյի մասին
Եվրոպայում թեյի մասին իմացել են 1517 թվականից, այն որպես նվեր՝ մատուցվել է Պորտուգալիայի արքային, նրան հպատակ նավագնացների կողմից։ 100 տարի անց թեյը սկսեց ներմուծվել հոլանդական առևտրական նավերով։ 1664 թվականից թեյն ընդունվեց որպես արարողական ըմպելիք անգլիական արքունիքի կողմից։ 18-րդ դարի սկզբից Լոնդոնում գործում էին թեյի մասնագիտացված խանութ և թեյարաններ։ Ներկայումս գոյություն ունի ավելի քան 3000 տեսակ թեյ։