Հայդուկ Շամլյանի «Դեպի ժողով» գրքի շնորհանդեսը

Օգոստոսի 1-ին՝ ժամը 19:00-ին, «Նարեկացի» արվեստի միությունում տեղի կունենա Հայդուկ Շամլյանի «Դեպի ժողով» գրքի շնորհանդեսը:
Սա հեղինակի թվով 5-րդ գիրքն է, որում պատմում է մի երկրի մասին, որը եղել է դրախտային երկիր, բայց ժամանակի ընթացքում չարն է տիրել այնտեղ և ամեն գեղեցիկ ու բարի բան վերածել է չարի:
Այս գիրքը կարելի է կարդալ, մեկնաբանել ու ընկալել տարբեր տեսանկյուններից և բազմազան ձևերով՝ ըստ ընթերցողի հայեցողության:
Բացարձակ խստություն, մարդու դեմ մարդու մոլեգին կատաղություն, խտացած անգթության պատկերացում, չարի կատարյալ հաղթանակ, սեփական դեպքերի միջից անհատական ճակատագրի վերացում, ծայրագույն դժբախտության տիեզերական ողբ, դյուցազներգական ոգեկոչում, հավերժական մթության մեջ վերջին աղոթքը, որը շաղված է կրակի և արյան մեջ…
Ամբողջ գիրքը հիմնված է իրական պատմությունների վրա, և երեսունից ավելի տարիներ անց հեղինակի առաջին հիշատակումն ու վերջնական հրաժեշտն է իր կորցրած մանկությանն ու չիրականացված պատանեկությանը…
Հայդուկ Շամլյանը մասնագիտությամբ իրավաբան է, նաև հրապարակագիր:
Ունի հրապարակված չորս գիրք, որոնցից երկուսը բանաստեղծությունների ժողովածուներ են. դրանցից մեկը հրատարակվել է Ստեփանակերտում:
Հայդուկ և Աիդա Շամլյանները դեռևս 2004թ.-ին այցելել են Արցախ և սիրահարվել այդ հողին ու ջրին:
Աիդա Շամլյանի նախաձեռնությամբ Շուշիում հիմնադրվել է «Արամ Մանուկյան» ճամբարը, որը հաճախող երեխաների թիվը տարեցտարի աճում է՝ հասնելով 400-ի:
Ճամբարի կարգախոսը եղել և մնում է «Մեկ ազգ, մեկ հայրենիք, մեկ ժողովուրդ, մեկ պետություն» սկզբունքը:
Մուտքն ազատ է: