Սերն անցումային դարաշրջանում

Օգոստոսի 1-ին՝ ժամը 19:00-ին, «Նարեկացի» արվեստի միությունում տեղի կունենա հանդիպում արձակագիր, թարգմանիչ Լիա Իվանյանի հետ, որի ընթացքում կներկայացվի Յուրի Պոլյակովի «Սերն անցումային դարաշրջանում» վեպի հայերեն թարգմանությունը:
Գրքում համարձակ փորձ է արվում հասկանալու 1985-1987 թվականներին ԽՍՀՄ-ում ազդարարված վերակառուցման էությունը:
Վեպի հերոսի՝ Գենադի Սկորյատինի դավաճանություններով լի փոխհարաբերություններն իր երեք կանանց հետ, համակերպումը երկրում և հարազատ խմբագրությունում տեղի ունեցող իրադարձություններին արտացոլում են անցումային դարաշրջանի գլխիվայր շուռ եկած արժեհամակարգի թողած դրոշմը յուրաքանչյուրի ճակատագրի վրա:
Լիա Իվանյանն ավարտել է բանասիրական ֆակուլտետը:
Աշխատել է ՀՍՍՀ պրոֆտեխ կրթության պետական կոմիտեում, Երևանի մասնագիտական կողմնորոշման կենտրոնում, «Ազատամարտ», «Դրոշակ», «Երկիր» պարբերականներում և թղթակցել է հանրապետության ու սփյուռքի մի շարք այլ պարբերականների, թարգմանել է 20-ից ավելի գեղարվեստական ֆիլմեր, եղել է «Նոր-Դար» գրական հանդեսի խմբագրակազմի անդամ, հանդիսանում է «Լիտերատուրնայա գազետայի» սեփական թղթակիցը Հայաստանում, 2014-ից հանդիսանում է «Լիտերատուրնայա գազետայի» «Երկիր Նաիրի» հավելվածի պատասխանատու խմբագիրը:
Մուտքն ազատ է: