Ժամանակակից քանդակը` Կարապի լճում
ԱՐՏ PR ընկերության նախաձեռնությամբ և ՀՀ Մշակույթի նախարարության աջակցությամբ` ս.թ. օգոստոսի 15-ից մինչև սեպտեմբերի 30-ը, Երևանի Կարապի լճում ներկայացվելու է ժամանակակից քանդակագործ` ԱՇՈՏ ՀԱՐՈՒԹՅՈՒՆՅԱՆԻ քանդակների յուրօրինակ ցուցահանդեսը:
Ցուցահանդես-նախագծը համադրելու համար, ԱՐՏ PR ընկերությունը հրավիրել է արվեստաբան Արա Հայթայանին, որը ներկայացնելով նախագիծը նշում է. «Կարապի լիճը այսօր ներկայանում է որպես քանդակային ցուցասրահ: Անդադար փոփոխվող ջրի հայելու մակերեսը այն հարթակն է, ուր ներկայացված են արվեստագետ Աշոտ Հարությունյանի մետաղական քանդակները: Վերացական մտածողությամբ օժտված և Հայսատանում իր տեսակի մեջ անկրկնելի արվեստագետը որպես նյութ օգտագործելով հետխորհրդային արդյունաբերական ջարդոնն ու այժմյան մետաղական արտադրանքը այն վերածում է իր հուշերն ու գեղագիտությունը մարմնավորող հնչեղ ձևագոյացումների: Ցուցահանդեսի նախաձեռնողները լիահույս են, որ Կարապի Լիճը որպես քանդակի մատուցման վայր վերածելու իրենց քայլը կընկալվի որպես Կարապի Լճի չօգտագործված ներուժը բացահայտող նախաձեռնություն: Սա մի առիթ է նաև բացահայտելու մերօրյա արվեստում մաքառող անհատականություններին և իր ձևի մեջ առաջին փորձն ու նախադեպը լինելով, այն ապագայում կարող է դառնալ արվեստ ներկայացնելու ավանդական միջոց»:
Ցուցադրությանը ներկայացված են 20-ից ավելի քանդակներ, որոնց մի մասն արդեն տեղադրված է Լճում, իսկ մյուսները պատրաստ կլինեն օգոստոսի 15-ին , նույն օրը` ժամը 19:00-ին տեղի կունենա բացման պաշտոնական արարողությունը:
Ցուցահանդեսի կազմակերպիչ` ԱՐՏ PR ընկերության տնօրեն Գայանե Դավթյանի կարծիքով. « Ժամանակակից հայ քանդակագործության այս նմուշներով ցուցադրվում է, թե ինչպես կարելի է սովորական քաղաքային, հանրային վայրերը դուրս բերել ամենօրյա առօրեական ռիթմից և տեղափոխել վերացական արվեստի հարթություն: Վերացական արվեստը «քարոզում է» ազատություն, իսկ այս ազատության դրսևորումը ոչ այլ ինչ է, քան քաղաքային մշակույթի մեջ կարծրատիպեր կոտրելու յուրահատուկ ակտ:
Այս ցուցադրությունը հավակնում է դառնալ երևանցիների, ինպես նաև զբոսաշրջիկների ամենասիրելի ժամանակահատվածը: Ցուցահանդեսի կարևոր նպատակներից է` երիտասարդ սերնդի մեջ արթնացնել սեր` արվեստի հանդեպ, սեր` քաղաքի հանդեպ, ցույց տալ, որ Երևանում մոնումենատալ արձաններին ու ավանդական արձանագործներին լրացնում են նաև այլ արվեստագետներ»:
ԱՐՏ PR ընկերությունը հատուկ շնորհակալություն է հայտնում Երևանի քաղաքապետարանին` ցուցահանդեսի կազմակերպչական աշխատանքներին մեծապես օժանդակելու համար:
Սիրով բոլորին հրավիրում ենք Երևանի Կարապի լիճ, որտեղ կարող եք ծանոթանալ նաև հեղինակի` քանդակագործ Աշոտ Հարությունյանի հետ:
ԱՐՏ PR ընկերություն
13 օգոստոսի 2017թ. Երևան