Կին ռեժիսորներ․ հետահայաց ցուցադրություն

Սեպտեմբերի 22
19:00
Վանդա / Wanda
Բարբարա Լոդեն / Barbara Loden, 1970թ․
Տևողություն՝ 102 րոպե
Բարբարա Լոդենի առաջին և վերջին ֆիլմը պատմում է մի կնոջ՝ Վանդայի, ընտանիքից բաժանման, նոր ճանապարհ ընկնելու, մենակության և բռնության մասին։ Որոշ առումով՝ այս ֆիլմը Նոր Հոլիվուդի կարևորագույն, բայց չճանաչված նմուշներից է։
21:00
Որոշ կանայք / Certain Women
Քելլի Ռեյքհարդ / Kelly Reichardt, 2016թ․
Տևողություն՝ 107 րոպե
Ֆիլմը բացահայտում է երեք անձնական պատմություն: Առաջինում իրավաբան Լորա Ուելսը (Լորա Դերն) չի կարողանում ազատվել կպչուն հաճախորդ Ֆուլլերից (Ջարեդ Հարիս), որն աշխատանքի ընթացքում ստացած վնասվածքի պատճառով հաշմանդամություն է ձեռք բերել, սակայն բյուրոկրատական պատճառներով զրկված է ֆինանսական փոխհատուցումից: Ֆուլլերը անմտության աստիճանի հուսահատ քայլի է դիմում. պատանդ է վերցնում գրասենյակային կենտրոնի պահակին: Երկրորդ պատմության մեջ հանդիպում ենք ամուսնական զույգի՝ Ռայանին (Ջեյմս Լեգրոս) և Ջինային (Միշել Ուիլյամս). կինը մտադրված է տեղի բնակիչ Ալբերտից (Ռենե Օբերժենո) քարեր գնել, որոնք անհրաժեշտ են քոթեջի կառուցման և ընտանիքն ամրացնելու համար: Երրորդ մասում ձիապան Ջեյմին (Լիլի Գլեդսթոուն), ձանձրույթից խուսափելու համար, կրթական համակարգի մասին լեկցիաների է գնում, որտեղ ծանոթանում է երիտասարդ դասավանդող Բեթի (Քրիսթեն Սթյուարտ) հետ, որը դասերին հասնելու համար ամեն անգամ երկար ճանապարհ է անցնում, ակնհայտորեն ատում է այդ ճամփորդությունները և երազում է փաստաբան դառնալու մասին: Ամեն երեկո սրճարանում նրանք կարճ երկխոսություններ են ունենում:
Սեպտեմբերի 23
19:00
Անտուն, օրենքից դուրս / Sans toit ni loi
Անյես Վարդա / Agnès Varda, 1985թ․
Տևողություն՝ 105 րոպե
1985թ. ֆիլմում թափառական մի կնոջ կյանքի իրատեսական կինոպատումները զուգակցված են պսեվդովավերագրական դրվագների հետ: Հերոսուհու կյանքի վերջին օրերին իրեն ճանաչած մարդիկ, անմիջականորեն դիմելով տեսախցիկին, պատմում են նրա մասին:
21:00
Հավաքողները և ես / Les glaneurs et la glaneuse
Անյես Վարդա / Agnès Varda, 2000թ․
Տևողություն՝ 82 րոպե
Անյես Վարդան ֆիլմ է նկարահանել չափավորության և շռայլության, խնայողության և գերծախսի մասին, իրերի մասին, որոնք դեն են նետված, որովհետև շուկայում հայտնվել են ավելի նոր, կատարելագործված իրեր, իսկ հները չեն համապատասխանում նոր չափանիշներին։ Որոշակի չափից մեծ կարտոֆիլը դեն է նետվում։ Որպեսզի գինին համարվի էլիտար, արտադրանքը պիտի հստակ ծավալի լինի. ավելացած խաղողը փտում է հողի վրա: Աղբամաններում կարող ենք գտնել ապրանքներ, որոնց պիտանելիության ժամկետը դեռ չի լրացել։ Աշխարհում ամեն վայրկյան սովից մահանում է երեք մարդ, բայց նույն պահին խանութում մեկ օր ավել մնացած, ավելորդ տեղ զբաղեցնող սննդամթերքը նետվում է աղբամանի մեջ։
Ֆիլմում տեղ են գտնում թե նետված իրերը, թե դրանք հավաքող և օգտագործող մարդիկ: Վարդային հաջողվում է տեսնել այդ մարդկանց մեջ ինչ֊որ ջերմություն, եղբայրության զգացում և կյանքի դժվարություններին հակառակ՝ երջանիկ ապրելու ունակություն: Տեսախցիկի օգնությամբ նա մեզ այդ մարդկանց գիտակից դիրքորոշման իրեղեն ապացույցներ է տրամադրում, դիրքորոշում, ըստ որի, պետք է պահել և հոգատարությամբ օգտագործել ցանկացած պիտանի իր։ Թափոններում նաև պոեզիա է գտնվում. Վարդան ցույց է տալիս արտիստների և նրանց՝ աղբից պատրաստված ստեղծագործությունները:
Սեպտեմբերի 24
19:00
Խնձոր / Sib
Սամիրա Մախմալբաֆ / Samira Makhmalbaf, 1998թ․
Տևողություն՝ 86 րոպե
Հայրը երկար տարիներ տան մեջ փակված է պահել իր երկու 11-ամյա դստրերին։ Իրանցի ռեժիսյոր Սամիրա Մախմալբաֆի ֆիլմը իրական պատմության վերակառուցում է, որտեղ դերասանները պատկերում են հենց իրենց անձնական փորձը:
21:00
Վաջդա / Wadjda
Հայֆա ալ Մանսուր / Haifaa Al-Mansour, 2012թ․
Տևողություն՝ 98 րոպե
Սաուդյան Արաբիայում կնոջ կողմից նկարահանված առաջին լայնամետրաժ ֆիլմը պատմում է 11-ամյա աղջկա՝ հեծանիվ ունենալու երազանքի մասին, որը գրեթե անհնար է իրականացնել՝ երկրում կանանց նկատմամբ կարծրատիպերի և ճնշումների պատճառով։
Ֆիլմերը կցուցադրվեն անգլերեն կամ ռուսերեն ենթագրերով։