Տիգրան Ասատրյան - անհատական ցուցահանդես - Tigran Asatryan
Ավանդույթի համաձայն՝ Հենրիկ Իգիթյանի ծննդյան տարեդարձի առիթով, առաջին անգամ Ժամանակակից արվեստի թանգարանում ներկայացնում ենք նոր անուն՝ Տիգրան Ասատրյան։
Ցուցադրության մեջ ներառված են տարբեր տարիների գեղանկարչական և գրաֆիկական աշխատանքներ։
Ունենալով բնական ինտելեկտ՝ Տիգրան Ասատրյանը կասկածի տակ չի առնում անվիճելի ճշմարտությունը և համամարդկային արժեքները, սակայն թույլ է տալիս իրեն մեկ կտավի մեջ համաձուլել տարբեր ժամանակաշրջաններ և ոճեր, կերպարներ և հասկացություններ, ավանդական և ժամանակակից միջոցներ։ Հաճախ նկարիչը ստեղծում է գեղանկարչական իրավիճակներ, ուր գործողությունը ծավալվում է անորոշ տարածության և պայմանական ժամանակի մեջ։ Այստեղ կան հիշողություններ դասական արվեստից, մանկական տեսիլքներ, ժամանակակից կերպարներ, երկրաչափական կառուցվածքներ։ Արդյունքում ստեղծվում են ինքնատիպ, իրենց բնավորությունը ունեցող կտավներ։