Եղեգիս Ֆեստ / Yeghegis Fest

«Եղեգիս Ֆեստ». բնության, մեղրի, երաժշտության և կայուն համակեցության փառատոն

Ամսաթիվ՝ հուլիսի 25
Վայր՝ Վայոց ձոր, Եղեգիս համայնք, Հորս բնակավայր
Մուտքը՝ ազատ

«Եղեգիս Ֆեստ»-ը բացառիկ հարթակ է, որի առանցքում Հայաստանի հարուստ կենսաբազմազանության պահպանումն է և մարդ-վայրի բնություն անվտանգ ու ներդաշնակ համակեցության մոդելի հանրայնացումը։

Վայոց ձորի այս հատվածն աչքի է ընկնում իր ուրույն, վայրի էկոհամակարգով, որտեղ կողք կողքի ապրում են Հայաստանի Կարմիր գրքում գրանցված բեզոարյան այծերը, գորշ արջերը և կովկասյան հովազը։ Փառատոնը մեկտեղում է բնության ինքնատիպությունը, տեղական էկո-բարիքներն ու որակյալ կենդանի երաժշտությունը՝ բաց երկնքի տակ։

Ողջ օրվա ընթացքում այցելուների համար բաց կլինի Eco-Market Zone-ը, որտեղ կարող եք ձեռք բերել տեղական կայուն արտադրության էկո-բարիքներ և լեռնային մեղր, ինչպես նաև կգործի հարմարավետ Food Court & picnic zone՝ բացօթյա հանգստի համար։ Օրվա հիշողություններն անմահացնելու համար տարածքում կգործեն յուրօրինակ ֆոտո-գոտիներ։

Հնարավորություն կունենաք մասնակցելու կարճ զբոսանքների և հատուկ էկո-ճանաչողական տուրերի դեպի տարածաշրջանի պատմամշակութային վայրեր՝ Սմբատաբերդ, Հրեաների գերեզմանատուն, Եղեգիս բնակավայր, ինչպես նաև կազմակերպվելու են այցելություններ տեղի գյուղատնտեսական տնտեսություններ։

Ծրագրում ներառված են ինտերակտիվ խաղեր, ստեղծագործական աշխատարաններ, արվեստի նմուշների ցուցադրություն և փառատոնային տարբեր մրցույթների ամփոփում։

Փոքրիկ հյուրերի համար պատրաստված են հատուկ մանկական հետաքրքիր խաղեր և բնապահպանական ուսուցողական մուլտֆիլմերի դիտումներ։

Փառատոնի երաժշտական հարուստ ծրագիրն ապահովելու են.

- Սաֆարյան համերգային ծրագիրը (17:00)
- ⁠Գլխավոր բեմական ծրագիրը՝ լեգենդար «Լավ Էլի» բենդի մեծ համերգով (18:00)

Փակման փուլ. Շնորհակալագրերի տրամադրում, ամփոփիչ խոսք և էներգիկ DJ set՝ հանգստի գոտում երեկոն հիասքանչ ավարտելու համար։

Այս իրադարձությունն իրականացվում է Միացյալ Թագավորության կառավարության աջակցությամբ՝ Darwin Initiative-ի միջոցով, ՀՀ ԷՆ Զբոսաշրջության կոմիտեի աջակցությամբ, ինչպես նաև Bears in Mind հիմնադրամի ֆինանսավորմամբ։ ՄԱԿ-ի Կենսաբազմազանության համաժողովին (COP17) ընդառաջ, որը հյուրընկալելու է Հայաստանը, «Եղեգիս Ֆեստ»-ը հանդես է գալիս որպես պատրաստի, կենդանի մոդել՝ ցույց տալով, թե ինչպես ճիշտ տեխնոլոգիաների (արևային էլեկտրական հովիվներ, մոնիտորինգ) և համայնքային ներգրավվածության շնորհիվ կարելի է լուծել էկոլոգիական լրջագույն մարտահրավերները։

Արի՛ Եղեգիս, լսի՛ր բնության զարկերակը, վայելի՛ր կենդանի հնչողությունն ու դարձի՛ր կայուն ապագայի մի մասնիկը։