«Գարնանային կառնավալ» կրթական ծրագիր/ Spring Carnival
Այլ
Կրթական ծրագիրը հիմնված է «Ռոբերտ Էլիբեկյան. Արտացոլումներ» ցուցադրության վրա:
Ծրագիրը նախատեսված է 2 տարբեր տարիքային խմբերի դպրոցականների համար` 7-13 և 14 +:
Ծրագրի առաջին մասում մասնակիցները շրջայց կունենան ցուցասրահում` ծանոթանալով արվեստագետ Ռոբերտ Էլիբեկյանի ստեղծագործություններին: Ինտերակտիվ հարցուպատասխանի օգնությամբ նրանց կներկացվեն մանրամասներ նկարչի ստեղծագործական ուղու մասին՝ անդրադառնալով ոչ միայն արվեստագետի գեղանկարներին այլ նաև բեմանկարչական գործունեությանը, և այս համատեքստում դրանց փոխազդեցությանը:
Ծրագրի երկրորդ մասը կշարունակվի կենտրոնի Ստեղծագործական սրահում:
- 7-13 տարեկան մասնակիցները, նախքան ստեղծագործական մասին անցնելը, կդիտեն տեսանյութ նկարչի բեմանկարչական աշխատանքների և թատերական ներկայացումների հերոսների մասին:
- 14 տարեկանից բարձր պատանիներին կառաջարկվի տեսանյութ՝ կերպարվեստում «Թիֆլիսյան դպրոցի», վերջինիս պատմական ու ոճական առանձնահատկությունների, և այս համատեքստում, Ռոբերտ Էլիբեկյանի արվեստի դերի մասին:
Ծրագրի ստեղծագործական մասում 7-13 տարեկան մասնակիցները կստեղծեն բեմական պարագաներ՝դեկորատիվ գլխարկներ, դիմակներ, հովհարներ, իսկ 14 տարեկանից բարձր մասնակիցները՝ բեմական կերպարների մոդելներ:
Կրթական նախաձեռնության շրջանակներում կենտրոնը համագործակցել է արվեստագետի՝ Ռոբերտ Էլիբեկյանի հետ, ում անմիջական մասնակցությամբ մշակվել են ծրագրի կարևոր ստեղծագործական մոտեցումներից:
