Պողիկտոս

Ա. Սպենդիարյանի անվան օպերայի և բալետի ազգային ակադեմիական թատրոնում նոյեմբերի 9-ին երկարատև դադարից հետո վերականգնված տարբերակով կներկայացվի իտալացի կոմպոզիտոր Գաետանո Դոնիցետտիի երեք գործողությամբ «Պողիկտոս» օպերան:
Գաետանո Դոնիցետտիի Պողիկտոս օպերայի իտալերեն լիբրետոյի հեղինակն է Սալվատորե Կամմարանոն, գրված Պիեռ Կոռնելիի «Պողիկտոս» ողբերգության(1641-1642) հիման վրա:
Օպերան ստեղծվել է 1838 թվականին Նեապոլի «Սան-Կարլո» թատրոնի համար, սակայն բեմադրությունը վերջին պահին արգելվել է կրոնական բովանդակության պատճառով։ 1840 թ. Դոնիցետտին վերամշակել է օպերան ֆրանսիական բեմի համար։ «Մարտիրոսներ» անվանումով այն բեմադրվել է 1840 թվականի ապրիլի 10-ին: Իտալական տարբերակի առաջնախաղը կայացել է 10 տարի անց՝ 1848 թ. նոյեմբերի 30-ին Նեապոլի նույն թատրոնում:
Երևանի օպերայի և բալետի ազգային ակադեմիական թատրոնում «Պողիկտոսի» առջնախաղը կայացել է 1993 թվականի ամռանը՝ Տիգրան Լևոնյանի բեմադրությամբ։ Պարտիտուրան Հայաստան է բերվել 1970-ականներին Վատիկանի գրադարանից՝ Վազգեն Առաջինի և Հռոմի պապի բանակցությունների շնորհիվ։
Օպերայի սյուժեի հիմքում ընկած է 3-րդ դարում Մալաթիա (Մելիտենե) քաղաքում ապրած ազգությամբ հայ Պողիկտոսի մարտիրոսական մահվան պատմությունը։
Չանսալով իր կնոջ պաղատանքներին, աներոջ խնդրանքներին՝ վերադառնալ հնոց հավատին, Պողիկտոսը քրիստոնեություն էր ընդունել, ենթարկվել էր հետապնդումների և հենց աներոջ կողմից էլ տանջամահ էր արվել։
Տոմսերի արժեքը՝ 2000-10 000 դրամ: