Քաղաք «Հունդերթվասեր» կրթական ծրագիր
Այլ
Գաֆէսճեան արվեստի կենտրոնը հայտարարում է Քաղաք «Հունդերթվասեր» նոր կրթական ծրագրի մեկնարկը, որն իրականացվում է «Ֆրիդենսրայխ Հունդերթվասեր. Ռեգենթագ» ցուցահանդեսի շրջանակներում: Ֆրիդենսրայխ Հունդերթվասերը (1928-2000) անկասկած 20-րդ դարի հետպատերազմյան արվեստի վառ և հակասական կերպարներից է: Ջերարդ Լ. Գաֆէսճեան հավաքածուին պատկանող «Ռեգենթագ» պորտֆոլիոն (Հայացք անձրևոտ օրը) Հունդերթվասերի ամենահայտնի գործերից է` բաղկացած տասը տպագիր ստեղծագործություններից: Ծրագրի առաջին մասում մասնակիցները շրջայց կունենան ցուցասրահում, կծանոթանան Հունդերթվասերի ստեղծագործություններին, նրա հիմնական գաղափարներին և նկարչական ոճին: Հաջորդիվ` կենտրոնի Ստեղծագործական սրահում կներկայացվի նյութ Հունդերթվասերի ճարտարապետական կառույցների մասին: Ներշնչված ավստրիացի արվեստագետի ճարտարապետական և բնապահպանական մոտեցումներից՝ մասնակիցները կստեղծեն իրենց յուրահատուկ «Քաղաք Հունդերթվասեր»-ի մանրակերտը:
«Քաղաք Հունդերթվասեր» ծրագրի շրջանակներում Գաֆէսճեան արվեստի կենտրոնը կհամագործակցի «Ուրբանլաբ Երևան» ճարտարապետական գրասենյակի հետ:
Ծրագիրը մասնակիցներին հնարավորություն է ընձեռում ծանոթանալու Ֆրիդենսրայխ Հունդերթվասերի ստեղծագործություններին և փիլիսոփայությանը՝ ընձեռելով հրաշալի առիթ՝ վայելելու թանգարանի անմիջական և ստեղծագործական մթնոլորտը:
«Քաղաք Հունդերթվասեր» ծրագիրը նախատեսված է 14 տարեկանից բարձր պատանիների և մեծահասակների համար: Ծրագրին մասնակցությունն անվճար է, պարտադիր նախնական գրանցմամբ:
