Դիրք Միխայելիսի, Սորեն Բիրքեի և Ուվե Ֆիշերի համերգը
Համերգը անց է կացվում «Եվրոպական ժառանգության օրեր» ծրագրի շրջանակներում և նվիրվոծ է Հայաստանի Անկախության 25րդ տարելիցին:
Սորեն Բիրքեն ծնվել է 1966թ. մարտի 22-ին: Շրթհարմոն նվագել սկսել է ինքնուրույն 1982 թվականից: 1988-1995թթ. սովորել է Բեռլինի Հումբոլդտի անվան պետական համալսարանի արվեստի բաժնում: Մասնագիտացել է որպես ռոք երաժիշտ: Եղել է “Grienhorn” խմբի անդամ, իսկ 1995-1999թթ. նվագել է “Blues” և “Loose” խմբերում: 2002 թվականից մինչ այսօր համագործակցում է Գերմանիայում հայտնի երաժիշտ և երգիչ Դիրք Միխաելիսի հետ: 2006 թվականից դուդուկի դասընթացներ է անցել հայազգի նշանավոր դուդուկահարներ Ջիվան Գասպարյանի և Գևորգ Դաբաղյանի մոտ:
1983-2008թթ. երաժիշտը մասնակցել է բազմաթիվ մրցույթների, փառատոների և համերգների Գերմանիայում, Միացյալ Նահանգներում, Ավստրալիայում, Լեհաստանում, Հայաստանում: 1996-1998թթ. հանդիսացել է “Zungenschlag” և “Veranstaltungs” փառատոների կազմակերպիչներից: 2011թ. ելույթ է ունեցել Ռուսաստանում Տավիղի միջազգային 7-րդ փառատոնին: Տարիների ընթացքում համագործակցել է հայտնի երաժիշտների հետ, հրավիրվել է նվագելու տարբեր համերգային միջոցառումների ժամանակ: 2014 թվականից “Buschfunk Blues” խմբի անդամ է: 2015թ. շրջագայել է երաժիշտներ Դեդի Հեմինգուեյի և Բլեք Կամիկաձեի հետ: 2007 թվականից մինչ այսօր Բեռլինի երաժշտական հանձնաժողովի խորհրդի անդամ է: 2011թ. նախաձեռնել է «Երաժշտություն 2020» և «Երաժշտական խորհուրդ» քարոզարշավները: 2016 թվականից “CIB – Creativ Industries Berlin” ընկերության համահիմնադիրն է:
Հայտնի երաժիշտ և երգիչ Դիրք Միխաելիսը ծնվել է 1961թ. նոյեմբերի 26-ին: Սովորել է Բեռլինի Ֆրիդրիխսխայն երաժշտական դպրոցում: Նվագում է դաշնամուր և կիթառ: Սկսել է ստեղծագործել 1980 թվականից: Մեծ սեր ունի հայկական դուդուկի հանդեպ, և համերգների ժամանակ նրա ստեղծագործություններին ուղեկցում է դուդուկի մեղեդին: Համերգներ է ունեցել դուդուկի վարպետներ Ջիվան Գասպարյանի և Գևորգ Դաբաղյանի հետ:
Դիրք Միխաելիսը իր երաժշտական գործունեությունը սկսել է հայտնի “Karussell” խմբում, որի կազմալուծումից հետո` 1991թ., սկսել է իր սոլո կարիերան: Արդեն 1992թ. նա ուներ մի շարք ձայնագրություններ: 1993թ. միավորվել է Անդրե Գերցբերգի և Դիրք Զոլների հետ և ստեղծել «Երեք բարձր լիգաներ» խումբը: 2011թ. երաժիշտը թողարկել է իր 11-րդ ալբոմը: Մի շարք հայտնի երգերի հեղինակ է: Նրան մեծ համբավ է բերել «Երբ ես հեռացա» երգը, որը ստեղծվել է Բեռլինյան պատի փլուզման շրջանում և մինչև հիմա ժողովրդի կողմից հնչում է որպես հիմն:
Այժմ Դիրքին նվագակցում են Սորեն Բիրքեն (շրթհարմոն ու դուդուկ) և Ուվե Ֆիշերը (կիթառ):
Մուտքն ազատ է: