Նոր կրթական ծրագիր. «Երաժշտական զբոսանքներ»

Գաֆէսճեան արվեստի կենտրոնում մեկնարկում է նոր կրթական նախագիծ՝ նախատեսված ընտանիքների և պատանիների համար:
Ապրիլի 8-ին, ժամը 14:00-ին Գաֆէսճեան արվեստի կենտրոնի հատուկ միջոցառումների սրահում մեկնարկում է նոր կրթական ծրագիր՝ «Երաժշտական զբոսանքներ»՝ նախատեսված 6-12 տարեկան երեխաներ ունեցող ընտանիքների և պատանիների համար:
ԵՐԱԺՇՏԱԿԱՆ ԶԲՈՍԱՆՔՆԵՐ նախագծի նպատակն է դասական երաժշտությունը հասանելի դարձնել հասարակության լայն շերտերի համար, վաղ տարիքից հետաքրքրություն և սեր ձևավորել դասական երաժշտության հանդեպ, կառուցել ամուր և շարունակական հարաբերություններ ընտանիքների և պատանեկան լսարանի հետ:
Ունկնդրի հետ մտերմիկ երաժշտական զբոսանքների դուրս կգա երաժշտագետ, դաշնակահար Մարինե Կարոյանը: Զբոսանքի ճանապարհը կունենա բազմաթիվ մեծ ու փոքր հանգրվաններ՝ երաժշտական լեզու, հայտնի ստեղծագործությունների անհայտ պատմություններ, երաժշտության ու կերպարվեստի կապը, երաժշտական գործիքներ, հնի արտահայտությունը նորի մեջ, համերգ և ունկնդիր և այլ հետաքրքրաշարժ անդրադարձեր։
Յուրաքանչյուր հանդիպում նվիրված կլինի մի ժամանակաշրջանի՝ նախօրոք ընտրված թեմայի շրջանակներում: Հանդիպումները կկրեն ինտերակտիվ բնույթ և կուղեկցվեն գործնական աշխատանքներով: Ունկնդրի հարցը, պատասխանը և առաջարկները ցանկալի պայմաններից են։
Մարինե Կարոյանն ավարտել է Երևանի Կոմիտասի անվան պետական կոնսերվատորիան երկու մասնագիտություններով՝ դաշնակահար և արվեստաբան։ Ավարտել է նույն կոնսերվատորիայի ասպիրանտուրան։ Երկար տարիներ դասավանդել է Կոնսերվատորիայում, Մանկավարժական համալսարանում։ Հիմնադրել և ղեկավարել է Դիլիջանի Միջազգային Դպրոցի երաժշտության բաժինը։ Ելույթ է ունենում համերգներով։ «ԱՐէ» կատարողական արվեստի միջազգային փառատոնի գեղարվեստական ղեկավարն է։
Ծրագիրը տեղի կունենա շաբաթ օրերին.
• յուրաքանչյուր ամսվա երկրորդ շաբաթ օրը կհյուրընկալվեն ընտանիքները
• յուրաքանչյուր ամսվա վերջին շաբաթ օրը կներգրավվեն պատանիները:
Մասնակցությունն անվճար է, պարտադիր նախնական գրանցմամբ: