«Վերապրում» ֆիլմի ցուցադրում ՆԱՄ-ում

«Նարեկացի» արվեստի միությունում դեկտեմբերի 21-ին՝ ժամը 19:00-ին, տեղի կունենա ռեժիսոր Մարինե Ասատրյանի «Վերապրում» ֆիլմի ցուցադրումը:
Մարինե Ասատրյանը տարիների ընթացքում հիմնադրել է «Շոկոլադ», «Ավետիս», «Կանթեղ» թատերախմբերը և «Մենք ենք», «Ռոտոնդա», «Իմ թատրոն» ներառական թատերախմբերը:
«Վերապրում» ֆիլմի հերոսները դերասաններ չեն, այլ վերապրածներ և նրանց սերունդները:
Նկարահանումները կատարվել են 2010 թվականին Հալեպում, Տեր Զորում, Շեկ անապատում:
Հարյուր տարի հետո կրկնված դեպքերի պատճառով ֆիլմի մասնակիցներից շատերը նորից բռնել են գաղթի ճամփան, նորից քանդվել է նախնիների հիշողության կծիկն ու վերակծկվել՝ հանգուցվելով նոր սերնդի գրեթե կրկնվող հիշողությանը:
2015 թվականին Հայաստանում նկարահանվել է ֆիլմի շարունակությունը, որում օգտագործվել են նաև արխիվային կադրեր:
Ֆիլմի կայացմանն աջակցել է Պալըխյան ընտանիքը:
Մուտքն ազատ է: