Իրադարձություն ընդհանուր պլանում

09-30.11.2016 Վահրամ Գալստյանի «Իրադարձություն ընդհանուր պլանում» նախագիծը
Համադրողներ՝ Նազարեթ Կարոյան և Հարություն Զուլումյան
Բացումը՝ ժամը 18:00-ին
Կավի ճանապարհը. իրադարձություն ընդհանուր հարթության վրա։
Ի՞նչ է իրադրաձությունն որպես այդպիսին. կավի համար, օրինակ, թրծվելն է, հողից խեցի դառնալու ընթացքը։ Այն գոյաբանական երկու հարթությունների՝ իրականի ու փաստականի միջև եղած կապն է։ Իրական հարթությունը գոյության երևութականությունն է՝ շրջելիությունը, փաստականը՝ դրա էականությունը, կյանքի անշրջելիությունը։ Այս դրույթը տարածելով կավի վրա՝ կարող ենք ասել. եթե հողը կավի իրականությունն է՝ նրա երևութական գոյությունը, ապա խեցին նրա փաստականությունն է՝ նրա էական կյանքը։
Վահրամ Գալստյանը իր, կյանքի հետ նույնանալ ձգտող նախագծում կավի գոյության ու նրա կյանքի այս երկու հարթություններն է խաղարկում։ Նրան հետաքրքրողը, հարաբերություններ են դրա իրական ու փաստական վիճակների միջև։
Յուրաքանչյուր մարդու կյանքն անկրկնելի է ու անշրջելի։ Անկրկնելի է ինչպես խեցե անոթը, ու անշրջելի, երբ այդ անոթը փշրված է։ Անհետացման դառությունն ու կորստի թախիծը առաջանում են, որպեսզի զորացնեն կյանքի հանդեպ մեր սերն ու բազմապատկեն դրա գոյությունը փառաբանելու մեր ձգտումը։
Վերախաղարկելով հողից խեցի անցման այս ընդհանուր իրադարձությունը, արվեստագետը պարզապես ցանկանում է մեզ հիշեցնել. գոյությունն իր արդարացման անհերքելի փաստարկն ունի՝ իմ և քո, մեր բոլորի կյանքը։
Նազարեթ Կարոյան